"Sa gherra 'e su latte"

"A sos Istados de S'unione

A sos Guvernos chi si faghent guvernare

A su politicu chi s'ingrassada in regione

A su potente chi los cheret irvenare

A chie no ascurtant sa resone

A chie no si cheret cunfrontare

Galu, no ant cumpresu cale razza

ant battidu a s'ischentiddare.

Galu, no ant connotu sos pastores

cando pinnigos falant in piatza

Unidos pro si riscattare,

si sunt cramados dae montes e mare

Pro faghere intendere sa 'oghe' issoro

Dae Barbaggia a Baronia

dae Costera a Logudoro.

Dae Gadhura a Campidanu

zuradu ant de cuntrastare

isfruttamentu e tirannia.

Dae costera a logudoro

dae Barbaggia a Baronia

Unidos pro si riscattare

Si sunt cramados dae montes e mare

Lagrimas pranghede 'oe su pastore

cà est cominzada sa gherra 'e su latte.

Miseros sessanta zentesimos a litru

L’hana privadu de onzi dirittu

Mamas, muzeres, fizas e fizos

Faghen corona a su pastore.

Minores e mannos artzant in piatza

cuddu istendardu chi lis faghet onore.

Est s’istendardu de sos battor moros

Su chi sos sardos zughene in coro

Est s’istendardu de sa libertade

In piatza oe pro sa dignidade

No zughent fusiles ne ferros ne matza

Ma zughent in manos su pane de onzi die

Sunt lagrimas biancas ch’infundent sa piatza.

Biancu su coro cando bi falat su nie".

Giuseppe Flore

***

Potete inviare le vostre lettere e segnalazioni a redazioneweb@unionesarda.it specificando il vostro nome e cognome e un riferimento telefonico. Nell'oggetto dell'email chiediamo di inserire la dicitura #CaraUnione.

(La redazione si limita a dar voce ai cittadini che denunciano disservizi o anomalie e non necessariamente ne condivide il contenuto)